Komentar |
| Eis Prezidente Autoridade Rejiaun Administrativa Espesiál Oé-cusse Ambeno (RAEOA), Marí Bin Amude Alkatiri iha Komemorasaun tinan 20 loron Konsulta Populár no Misaun INTERFET iha Timor-Leste, iha Oé-cusse, ho atividade Marça de Amor. Imajen: Cipriano Colo |
OÉ-CUSSE, Ohin povu Atoni-oan komemora tinan 20 loron Konsulta Populár no Misaun INTERFET iha Timor-Leste, ho atividade Marça de Amor.
Eis Prezidente Autoridade Rejiaun Administrativa Espesiál Oé-Cusse Ambeno (RAEOA), Marí Bin Amude Alkatiri, ne’ebé partisipa iha atividade ne’e, konsidera katak importante tebes tanba bele lori ambiente foun.
Alkatiri dehan, bainhira nia hetan konvite, hanesan novidade ida tanba ohin loron presiza atu hanorin jerasaun foun sira kona-ba prosesu tomak luta libertasaun nasionál no ida ne’e mak ema hotu persiza hatene.
“Objetivu atu bele hatudu dalan ba sidadaun hotu hodi kompriende kona-ba Konsulta Populár ninia importánsia”, nia akresenta.
Nune’e, líder istóriku ne’e husu atu edukasaun tenke halo ho vontade, nune’e bele eduka sidadaun sira sai patriota, hanesan estudante karik, sai estudante ne’ebé di’ak.
Iha mensajen prinsipál, nia kontinua krítika, tanba komemorasaun tinan 20 Konsulta Populár, maibé rai ne’e hakiduk fali ba kotuk no la la’o ba-oin.
“Ema hotu hatene katak, saida mak ha’u la gosta, la gosta duni, maibé ha’u rekoñese katak buat hirak ne’e hotu tama iha prosesu, ita persiza la’o ba oin nafatin”, subliña Alkatiri.
