Komentar |
| Diretór Ezekutivu ANAAA, Edmundo da Silva Viegas. Foto: UNILAB |
Dili, Diretór Ezekutivu Ajésia Nasionál Avaliasaun no Akreditasaun Akadémika (ANAAA), Edmundo Viegas, hateten kursu ka Departamentu Ensinu Pré-Eskolár ne’ebé loke ona iha Universidade Nasional Timor Lorosa´e (UNTL) ne’e hetan koñesimentu husi ANAAA no Ministériu Ensinu Superiór Siénsia no Kultura (MESSK).
Maibé la signifika kursu ne’e livre ona husi kritériu sira hotu. Ida ne’e nu´dar faze dahuluk ida ne’ebé Fakuldade Edukasaun, Arte no Umanidade (FEAH) tenke servisu hamutuk ho universidade hodi tau atensaun ba kualidade no fasilidade sira hotu ba tinan haat oin mai.
“Agora ami fó tempu ba sira atu ezerse funsionamentu kursu ne’e ba tinan haat maibé kuandu sira iha graduadu ona ba périodu dahuluk mak ami foin ba fali hodi halo avaliasaun,” hateten Diretór Edmundo Viegas ba jornalista Ajénsia TATOLI iha ninia Gabinete, Matadoru, kinta (22/08/2019).
Lider másimu ANAAA ne´e dehan, bainhira Departamentu Ensinu Pré-Eskolár ne´e hetan ona rejistu no lisensa, konserteza attividade sira ne’e bele lao ona. ANAAA fiar katak kursu Pré-Eskolár ne’e loke tanba Institutu públiku ne’e halo ona ninia estudu viablidade. Tanba saida mak kursu ne’e loke.
“Entaun ANAAA sei haruka fali ninia ekipa ida hodi halo fali intervensaun. Kuandu loos hotu ona mak Ministériu Ensinu Superiór Siénsia no Kultura foin aprova ninia lisensa sira ne’e. Ita hatene katak Instituisaun ida mesak labele realiza kursu ida ne’e maibé tanba hetan kooperasaun di´ak ho instituisaun ensinu superiór iha rai li´ur, tanba ne’e mak kursu ne’e bele realija,” tenik nia.
Tuir Diretór ANAAA, em princípio, sira aprezenta ona lisensa ne’e ba MESSK no ANAAA. “Entaun kursu ne’e bele lao ona maibé hahu agora ba oin tenke prepara kondisaun hotu atu nune’e bainhira avaliasaun tuir mai bele hetan rezultadu di´ak,” nia konklui.
