Komentar |
| Komunidade sira komesa okupa rai estadu nian iha area protejida Mata ninin Comoro nian. Imajen/Mídia MOP |
Dili, Sekretáriu Estadu Terras no Propriedade (SETP), Mario Ximenes, husu ba komunidade iha kapitál Dili atu labele kontinua okupa rai estadu hodi harii uma, liuliu área protejida.
Sekretáriu Estadu Mario Ximenes, hasai apelu ne’e relasiona ho númeru okupante ne’ebé aumenta bei-beik hodi okupa rai estadu iha área protejida, hanesan iha Lagoa Tasi Tolu ho area João Paulo II, tasi ibun no mota ninin.
“Husu komunidade atu labele konstroi uma arbiru iha fatin ne’ebé kategoria ba domíniu públiku,” hateten Sekretáriu Estadu Mario Ximenes, ba Ajénsia TATOLI, ohin, iha Palásiu Governu, Dili.
Área protejida iha área Tasi-Tolu ninian, tuir planu Governu da-ualu ne’ebé lidera husi Primeiru-Ministru, Taur Matan Ruak, sei dezenvolve sai fatin turizmu. Tanba ne’e, Sekretáriu Estadu Mario Ximenes, reprezenta Governu husu ba komunidade sira atu fó kontribuisaun hodi evita okupa área sira refere.
Iha tempu badak, Ministériu Justisa sei harii plaka iha área protejida sira iha Dili hodi evita okupante ilegál ba domíniu públiku iha futuru.
Husi sorin seluk, liuhusi kronolojia ofisial Facebook Servisu Obras Públikas nian fó sai katak, tékniku sira Servisu Obra Públikas nian ba haree diretamente abitasaun bairru sira nian ho di’ak.
Ministériu Obras Públikas mós simu ona koordinate husi Terras no Propriedade iha loron 21 Agostu 2019, kona-ba parsela rai sira ne’ebé identifikadu ba futuru konstrusaun abitasaun komunitária
