Komentar |
| Foto by : republika.co.id |
Dili, Fundu Mina-rai mak fundu soberana no úniku estadu Timor- Leste nian. Fundu ne'e harii iha I governu konstitusionál ne'ebé lídera hosi Dr. Mari Alkatiri. Osan sira ne’ebé rai iha Fundu Mina-rai mai hosi reseitas mina no gás kampu Bayu Undan no Kitan. Reseita mina no gás mosu hosi Tratadu Tasi Timor.
Tinan 2003 sai hanesan tinan ne'ebé susar tebes ba estadu tamba estadu osan laiha. Biar nune'e, Dr. Mari konsege negosia Tratadu Tasi Timor. Ho tratadu ne'e mak estadu Timor-Leste hahú hetan osan hodi hamoris Fundu Mina-rai.
Modelu jere osan mina-rai ne'ebé Dr. Mari fihir atu opta ba jestaun Fundu Mina-rai mak modelu Nourega. Dr. Mari matan monu ba modelu ne'e tamba nia hakarak osan ne'ebé rai iha Fundu Mina-rai tenke jere ho forma di'ak, prudente no transparente hodi fó benifisiu ba jerasaun agora no jerasaun sira ne'ebé mai. Ho Dr. Mari nia matenek no nia lideransa mak ohin-loron osan ne'ebé rai iha Fundu Mina-rai hamutuk 16 billoens resin. Aleinde ne’e, modelu jere osan hosi Fundu Mina-rai ne’e mós ohin-loron sai modelu referensia ba mundu tomak.
Hahú kedas iha tinan 2005 bainhira Dr. Mari estabelese Fundu Mina-rai to'o ohin-loron, montante totál osan iha Fundu Mina-rai hamutuk billoens 30 resin ona. Hosi billoens 30 ne'e CNRT ho nia aliadu sira mak gasta ona purvolta billoens 12 durante sira-nia ukun. Enkuantu billoens 1 resin lakon de'it durante CNRT ho nia aliadu sira-nia ukun. Gasta osan barak maibé grupu minoria de’it mak goza enkuantu povu maioria nafatin moris iha situasaun kiak no mizéria laran.
Fundu Mina-rai ne'ebé Dr. Mari harii sofre alterasaun dala-rua ona, primeira alterasaun iha tinan 2011 no segundu alterasaun mak foin daudauk governu AMP hakarak altera hodi armoniza ratifikasaun Tratadu Fronteira Marítima. Alterasaun ne’ebé foin daudauk governu AMP halo ho intensaun atu tane de’it AMP ho nia kronis sira-nia interese. Kuitadu governu AMP, imi-nia sentidu estadu ne'e iha ne'ebé?
Lori Dr. Mari nia matenek no nia lideransa mak ohin-loron estadu Timor-Leste iha osan hodi finansia despeza governu. Funsionáriu, veteranus, bolseiru no projetu boboot sira finansia hosi osan Fundu Mina-rai ne’ebé Dr. Mari mak harii iha tinan 2005. Aleinde ne’e, grupu elite kiikoan ida ne’ebé haleu Maun Boot Xanana Gusmão ohin-loron riku matak tamba osan hosi Fundu Mina-rai ne’ebé lori Dr. Mari nia servisu makaas, nia matenek no nia lideransa mak harii. Sira hotu ne'ebé haleu Maun Boot goza osan Fundu Mina-rai to’o haluha an hodi nafatin insulta, kritíka, difama no akuza Dr. Mari ho lia falsu oi-oin lahó fundamentus ne’ebé razoavél.
Source : https://www.facebook.com/TimorHauniaR
